កម្ពុជាធ្វើជាម្ចាស់ផ្ទះរៀបចំកិច្ចប្រជុំលើកទី៥ នៃគណៈកម្មការចម្រុះកម្ពុជា-កូរ៉េ (JC)

(ភ្នំពេញ)៖ នៅថ្ងៃទី៣១ ខែតុលា ឆ្នាំ២០២៣ កម្ពុជាបានធ្វើជាម្ចាស់ផ្ទះរៀបចំកិច្ចប្រជុំលើកទី៥ នៃគណៈកម្មការចម្រុះកម្ពុជា-កូរ៉េ (JC) នៅក្រសួងការបរទេស និងសហប្រតិបត្តិការអន្តរជាតិ។

លោកស្រី ទួត បញ្ញា រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និង លោក Chang Ho-jin អនុរដ្ឋមន្ត្រីការបរទេសទី១ នៃសាធារណរដ្ឋកូរ៉េ បានធ្វើជាសហប្រធានដឹកនាំនៃកិច្ចប្រជុំនេះ។

កិច្ចប្រជុំនេះ បានពិនិត្យឡើងវិញនូវសមិទ្ធផល និងបានពិភាក្សាលើមធ្យោបាយនានាដើម្បីពង្រឹងទំនាក់ទំនង និងកិច្ចសហប្រតិបត្តិការទ្វេភាគីបន្ថែមទៀតរវាងប្រទេសទាំងពីរលើវិស័យផ្សេងៗ រួមមាន នយោបាយ ពាណិជ្ជកម្មនិងវិនិយោគ ហេដ្ឋារចនាសម្ព័ន្ធ កសិកម្ម ការងារ ការអភិវឌ្ឍជនបទ សុខាភិបាល ការអភិវឌ្ឍធនធានមនុស្ស និងការផ្លាស់ប្តូររវាងប្រជាជននិងប្រជាជន ក្នុងចំណោមវិស័យជាច្រើនទៀត ។

កិច្ចប្រជុំ ក៏បានពិភាក្សាអំពីកិច្ចសហប្រតិបត្តិការក្នុងតំបន់ និងអន្តរជាតិដែលផ្តល់ផលប្រយោជន៍ទៅវិញទៅមក ក្រោមក្របខ័ណ្ឌអាស៊ាន-សាធារណរដ្ឋកូរ៉េ មេគង្គ-សាធារណរដ្ឋកូរ៉េ និងអង្គការសហប្រជាជាតិ ព្រមទាំងស្ថានការណ៍នៅឧបទ្វីបកូរ៉េផងដែរ៕

(សូមអានបន្ត)

រដ្ឋមន្ត្រីក្រសួងការងារ ជំរុញឱ្យសាលាប៉ូលឌុយប្រ៊ូលសហការពង្រីកវិសសាលភាពបណ្តុះបណ្តាលជំនាញសណ្ឋាគារ និងទេសចរណ៍

(ភ្នំពេញ)៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣១ ខែតុលា ឆ្នាំ២០២៣នេះ បានជំរុញឱ្យសាលាសណ្ឋាគារ និងទេសចរណ៍ ប៉ូលឌុយប្រ៊ូល និងស្ថាប័នជំនាញរបស់ក្រសួងធ្វើការរួមគ្នាក្នុងការពង្រីកវិសាលភាពនៃការបណ្តុះបណ្តាលជំនាញឯកទេសសណ្ឋាគារ និងទេសចរណ៍ដល់ពលរដ្ឋកម្ពុជា។ ការលើកឡើងបែបនេះ គឺធ្វើឡើងក្នុងជំនួបពិភាក្សាការងាររវាងលោករដ្ឋមន្ត្រី និងលោក ហ្រ្វង់ស័រ ស្មូបេលែន នាយកសាលាសណ្ឋាគារ និងទេសចរណ៍ ប៉ូលឌុយប្រ៊ូលនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។

សម្រាប់លោករដ្ឋមន្ត្រី កិច្ចសហការបណ្តុះបណ្តាលជំនាញឯកទេសសណ្ឋាគារ និងទេសចរណ៍នេះ នឹងជួយឱ្យពលរដ្ឋកម្ពុជាកាន់តែច្រើនបន្ថែមទៀតមានជំនាញជាក់លាក់ប្រកបដោយប្រសិទ្ធភាពខណៈដែលកម្ពុជាមានតម្រូវការកម្លាំងជំនាញនេះជាច្រើនបន្ថែមទៀតក្នុងទីផ្សារ។

ក្នុងជំនួបប្រកបដោយភាពស្និទ្ធស្នាលនោះ លោក ហ្រ្វង់ស័រ ស្មូបេលែន នាយកសាលាសណ្ឋាគារ និងទេសចរណ៍ បានបង្ហាញពីវឌ្ឍនភាពចំពោះការបណ្តុះបណ្តាលពលរដ្ឋកម្ពុជាមកពីគ្រប់កន្លែងជាពិសេសជនមានពិការភាពឱ្យមានជំនាញក្នុងវិស័យទេសចរណ៍ និងបដិសណ្ឋារកិច្ចជាក់លាក់ និងទទួលបានឱកាសការងារដែលទីផ្សារបានទទួលស្គាល់។

ជាមួយគ្នានេះ លោករដ្ឋមន្ត្រី បានលើកសរសើរ និងថ្លែងអំណរគុណដល់សាលាសណ្ឋាគារ និងទេសចរណ៍ប៉ូលឌុយប្រ៊ូលដែលបានផ្តល់ជំនាញពិតប្រាកដដល់ពលរដ្ឋកម្ពុជាជាច្រើនពាន់នាក់តាំងពីចាប់ផ្តើមដំណើរការនៅឆ្នាំ២០០២មក។

យ៉ាងណាក៏ដោយ មុននឹងបញ្ចប់លោករដ្ឋមន្ត្រី បានរំពឹងថា សាលាសណ្ឋាគារ និងទេសចរណ៍ ប៉ូលឌុយប្រ៊ូល និងស្ថាប័នជំនាញរបស់ក្រសួង នឹងសហការគ្នាដើម្បីពង្រីកការបណ្តុះបណ្តាលជំនាញវិជ្ជាជីវៈក្នុងវិស័យទេសចរណ៍ និងសណ្ឋាគារដល់ពលរដ្ឋកម្ពុជា ស្របទៅតាមទស្សនៈវិស័យរបស់ក្រសួងដែលផ្តល់អាទិភាពលើការបណ្តុះបណ្តាលជំនាញបច្ចេកទេសដល់ពលរដ្ឋដើម្បីមានជីវភាពកាន់តែប្រសើរ និងចូលរួមរុញច្រានកំណើនសេដ្ឋកិច្ចជាតិ៕

(សូមអានបន្ត)

ក្រសួងអប់រំ រៀបចំពិធីប្រគល់មេដាយសម្រាប់ការប្រកួតការឌីហ្សាញផលិតផលមេកាត្រូនិច

(ភ្នំពេញ)៖ ដើម្បីបង្កើនការយល់ដឹងការច្នៃប្រឌិតនិងបង្កើនជំនាញរបស់សិស្សនៅក្នុងវិស័យ ពហុវិនិច្ឆ័យ ឬបន្សំ អេឡិចត្រូនិក វិស័យផ្សេងៗនៃវិស្វកម្មដូចជា អគ្គិសនី កុំព្យូទ័រ និងមេកានិច ត្រូវការនៅក្នុងឧស្សាហកម្មស្វ័យប្រវត្តិកម្ម ក្រសួងអប់រំ យុវជន និងកីឡា និងគ្រឹះស្ថានស្រាវជ្រាវច្នៃប្រឌិត និងច្នៃប្រឌិតរបស់ក្រសួងអប់រំ បានសហការជាមួយក្រុមហ៊ុនអង្គការស្ទែមកម្ពុជា រៀបចំកម្មវិធីការប្រកួតការឌីហ្សាញផលិតផលមេកាត្រូនិច (Creative Mechatronic Product Design)។

តាមរយៈកម្មវិធីនេះបានផ្តល់ជាឱកាសសម្រាប់សិស្សានុសិស្សទាំងអស់ ដែលកំពុងសិក្សានៅថ្នាក់មធ្យមសិក្សាសាធារណៈ និងឯកជន ដើម្បីបង្ហាញពីការងារ និងសមត្ថភាព ឬជំនាញរបស់ខ្លួន ជាសាធារណៈលើភាពវៃឆ្លាត (ingenuity) ភាពច្នៃប្រឌិត (creativity) គុណប្រយោជន៍សំរាប់ប្រើប្រាស់ (utility) រូបរាង សណ្ឋាន ឬទម្រង់ (form) និងការបង្កើតមុខងារ (function)។

លើកឡើងក្នុងពិធីប្រគល់មេដាយសម្រាប់ការប្រកួតការឌីហ្សាញផលិតផលមេកាត្រូនិច​នារសៀលថ្ងៃទី៣០ ខែតុលា ឆ្នាំ២០២៣នេះ​ លោកបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានថ្លែងបញ្ជាក់ថា តាមរយៈកម្មវិធីនេះបានផ្តល់ឱកាសយ៉ាងធំធេងដល់សិស្សានុសិស្ស និងជួយដល់សិស្សានុសិស្សដូចជា ជួយឱ្យសិស្សានុសិស្សបានទទួលនូវបទពិសោធន៍ថ្មីពីការរៀន និងការសម្សាន្ត, សិស្សានុសិស្សបានចូលរួមបែបថ្មី ជាការរៀនដោយការគិតពិចារណា ដើម្បីដោះស្រាយបញ្ហា រៀនដោះស្រាយជាក្រុម។

លោកបណ្ឌិត សាន វឌ្ឍនា បានបន្ថែមដែរថា តាមរយៈកម្មវិធីនេះដែរ សិស្សានុសិស្សក៏អាចបានជួបប្រាស្រ័យទាក់ទងជាមួយនឹងការតម្រង់ទិស ការបង្វឹកពីបណ្តាអ្នកជំនាញដែលមានបទពិសោធន៍ជាច្រើន ដែលទាំងនេះជាការបន្ថែមពីលើការបង្រៀនរបស់លោកគ្រូ អ្នកគ្រូ និងតាមសាលារៀន ក៏ដូចជាការបង្វឹកដល់ខ្លួនឯងក្នុងរៀននៅក្នុងថ្នាក់រៀនផង និងនៅខាងក្រៅថ្នាក់រៀនផងដែរ ដើម្បីបង្ហាញនូវគំនិតឆ្នៃប្រឌិតថ្មី និងចេះមើលឃើញពីបញ្ហានៅក្នុងសង្គម និងចេះរកដំណោះស្រាយដើម្បីដោះស្រាយបញ្ហាទាំងនេះ។

សូមបញ្ជាក់ដែរថា ការចូលរួមរបស់សិស្សានុសិស្សពីគ្រឹះស្ថានមធ្យមសិក្សាសាធារណៈ និងឯកជនទាំងអស់នេះ ដើម្បីបានបញ្ចេញស្នាដៃនិងសមត្ថភាពរបស់ខ្លួនទៅលើ ភាពច្នៃប្រឌិតលើការរចនាផលិតផលមេកាត្រូនិចកម្រិតមធ្យមសិក្សា បានទទួលនូវអត្ថប្រយោជន៍ដូចជា៖ ទទួលបានថវិកាគាំទ្រសម្រាប់ធ្វើការផលិតស្នាដៃការរចនាផលិតផលមេកាត្រូនិច, ក្រុមជ័យលាភីតែមួយគត់ដែលមានស្នាដៃល្អបំផុតនឹងទទួលបានវត្ថុអនុស្សាវរីយ៍ ថវិកាលើកទឹកចិត្ត និងវិញ្ញាបនបត្របញ្ជាក់ការចូលរួម, ក្រុមដែលទទួលបានជ័យលាភីនឹងទទួលបានការបណ្ដុះបណ្ដាលបន្ថែមពីសំណាក់វិស្វករជំនាញដើម្បីបង្កើតជាស្នាដៃគំរូពេញលេញ, ចំពោះស្នាដៃផលិតផលមេកាត្រូនិចដែលទទួលបានជ័យលាភីនឹងត្រូវទទួលបានការផ្សព្វផ្សាយ និងការតាំងបង្ហាញជាសាធារណៈ។

គួរជម្រាបដែរ សិស្សានុសិស្សដែលបានចូលរួមក្នុងការប្រកួតនេះ បានទៅលើក្រុមលេខ១ បានទៅលើក្រុម M4TB, លេខ២ បានទៅលើក្រុម Builder Max, លេខ៣ បានទៅលើក្រុម ក្រុមយុរវជនថ្នាក់ទៅ១២, លេខ៤ បានទៅលើក្រុម Teen-Bot និងលេខ៥ បានទៅលើក្រុម ក្រុមបន្ទាយមានជ័យ៕

(សូមអានបន្ត)

ប្រជាពលរដ្ឋរងគ្រោះដោយសារជំនន់ទឹកភ្លៀង ៧៣គ្រួសារ នៅសង្កាត់ក្បាលកោះ ទទួលអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន

(ភ្នំពេញ)៖ ប្រជាពលរដ្ឋចំនួន៧៣គ្រួសារ រស់នៅក្នុងសហគមន៍វាលស្បូវ មានទីតាំងនៅក្នុងភូមិព្រែកធំ១ សង្កាត់ក្បាលកោះ ខណ្ឌច្បារអំពៅ ដែលរងគ្រោះដោយសារជំនន់ទឹកភ្លៀង បានទទួលអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នាល្ងាចថ្ងៃទី៣០ ខែតុលា ឆ្នាំ២០២៣នេះ។

សកម្មភាពមនុស្សធម៌នាំយកអំណោយរបស់កាកបាទក្រហមកម្ពុជា ទៅចែកជូនប្រជាពលរដ្ឋដល់លំនៅដ្ឋាននេះ ដឹកនាំដោយលោក ចេង មុនីរ៉ា ប្រធានកិត្តិយសអនុសាខាកាកបាទក្រហមកម្ពុជាខណ្ឌច្បារអំពៅ និងជាអភិបាលខណ្ឌ រួមជាមួយក្រុមការងារអនុសាខាកាកបាទក្រហមខណ្ឌជាច្រើននាក់ទៀត។

លោកអភិបាលខណ្ឌ បានណែនាំឱ្យប្រជាពលរដ្ឋមានការប្រុងប្រយ័ត្នខ្ពស់ពីសុវត្ថិភាព កូនចៅរបស់ខ្លួននៅក្នុងគ្រួសារ ហាមកូនចៅចុះលេងទឹក ជាពិសេសត្រូវប្រុងប្រយ័ត្ន ចំពោះសត្វអសិរពិសគ្រប់ប្រភេទ។ ថ្វីដ្បិតតែអំណោយទាំងនេះ មិនសមប្រកបទៅតាមការចង់បានរបស់ប្រជាពលរដ្ឋយ៉ាងណាក៏ដោយ តែវាបានសម្រាលការលំបាករបស់បងប្អូនមួយរយៈពេលដែរ ហើយនេះជាទឹកចិត្តដ៏ប្រពៃរបស់សម្ដេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈលោក ឃួង ស្រេង អភិបាលរាជធានីភ្នំពេញ សម្រាបយកមកជួយឧបត្ថម្ភដើម្បីសម្រាលទុក្ខលំបាករបស់បងប្អូនដែលមានជីវភាពខ្វះខាត ប្រជាពលរដ្ឋរងគ្រោះដោយអគ្គិភ័យប្រជាពលរដ្ឋរងគ្រោះដោយជំនន់ផ្សេងផ្សេង។

ជាមួយគ្នានេះដែរ លោកអភិបាលខណ្ឌបានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្ដេច តែងតែគិតគូរខ្ពស់ពីការរស់នៅរបស់ប្រជាពលតដ្ឋដោយមិនប្រកាន់និន្នាការនយោបាយ សាសនា ជាតិសាសន៍ ពណ៌សម្បុរ អ្វីនោះឡើយ។

លោកអភិបាលខណ្ឌបានផ្ដាំផ្ញើបន្ថែមដល់ប្រជាពលរដ្ឋនៅក្នុងសហគមន៍ បើជួបបញ្ហាខ្វះខាតជីវភាពគ្រួសារ បញ្ហាមិនប្រក្រតីណាមួយ ដែលកើតឡើងត្រូវរាយការណ៍បន្ទាន់ដល់អាជ្ញាធរ សង្កាត់ និងខណ្ឌដើម្បីរិះរកមធ្យោបាយដោះស្រាយជូន។

អំណោយដែលយកមកចែកជូននៅពេលនេះក្នុងមួយគ្រួសារៗ ទទួលបានអង្ករ ២៥គីឡូក្រាម និងថវិកាមួយចំនួន៕

(សូមអានបន្ត)

ឧបនាយករដ្ឋមន្ត្រី ហង់ ជួនណារ៉ុន អញ្ជើញបិទការប្រណាំងទូក «ង» នៅក្រុងកំពង់ចាម

(កំពង់ចាម)៖ លោកបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា នៅរសៀលថ្ងៃទី២៩ ខែតុលា ឆ្នាំ២០២៣នេះ បានអញ្ជើញជាអធិបតីបិទការប្រណាំងទូក «ង» បណ្តែតប្រទីប តាំងពិព័រណ៌ និង អុជកាំជ្រួច ក្នុងក្រុងកំពង់ចាម។

ក្នុងឱកាសនោះ អភិបាលខេត្តកំពង់ចាម លោក អ៊ុន ចាន់ដា បានឱ្យដឹងថា ចំនួនទូកដែលបានចូលរួមប្រកួតរយៈពេល ២ថ្ងៃ មានសរុប ៤៨ទូក ក្នុងនោះទូក «ង» មានចំនួន ២០ទូក និងទូកខ្នាតអន្តរជាតិមាន២៨ទូក។

លោកអភិបាលខេត្តបានបញ្ជាក់ផងដែរថា ទូកដែលទទួលជ័យលាភី គឺផែនលេខ១ មាន៥ទូក ទទួលបានពានរង្វាន់១ ទង់ជ័យលាភី១ និង ថវិកា ២លានរៀលក្នុង១ទូក។ ចំពោះផែនចំណាត់ថ្នាក់លេខ២ ទទួលបាន ទង់ជ័យលាភី១ និងប្រាក់ ១លាន ៥សែនរៀល ក្នុង១ទូក ។ រីឯផែនទូកចំណាត់ថ្នាក់លេខ ៣ ទទួលបានទង់ជ័យលាភី១ និងថវិកា ១លានរៀល ក្នុង ១ទូក ។

ឧបនាយករដ្ឋមន្ត្រី ហង់ ជួនណារ៉ុន បានយកឱកាសនេះវាយតម្លៃខ្ពស់ចំពោះ លោកអភិបាលខេត្តកំពង់ចាម និងអាជ្ញាធរពាក់ព័ន្ធទាំងអស់ ដែលបានរៀបចំព្រឹត្តិការណ៍ប្រណាំងទូក «ង» បណ្តែតប្រទីប តាំងពិព័រណ៌ និងអុជកាំជ្រួច ដើម្បីបង្កនូវក្តីសប្បាយរីករាយ ជូនដល់ប្រជាពលរដ្ឋនៅក្នុងខេត្តកំពង់ចាម ក៏ដូចជាភ្ញៀវជាតិ និងអន្តរជាតិមកពីទីជិតឆ្ងាយ ក្រោមម្លប់នៃសន្តិភាព។ ម្យ៉ាងទៀតការផ្ដួចផ្ដើម រៀបចំឱ្យមានពិធីនេះឡើង គឺពិតជាបានចូលរួមថែរក្សា នូវវប្បធម៌ប្រពៃណី និងលើកស្ទួយវិស័យកីឡាអុំទូករបស់យើងផងដែរ៕

(សូមអានបន្ត)